На Интернет ќе бидат објавени 68 педофили во Македонија, во регистар кој ќе содржи фотографии, имиња и презимиња на осудените за кривични дела сексуална злоупотреба на деца и педофилија. Јавно ќе бидат достапни и адресите каде што живеат педофилите, датумот на нивното раѓање, како и кривичното дело за кое се осудени.

Покрај педофилите, во регистарот ќе бидат објавени и макроата, лица кои снимаат и дистрибуираат детска порнографија, како и оние што се осудени за трговија со деца.

Спиро Ристовски, министерот за труд и социјална политика, изрази жалење за случајот во кој молер сексуално ги злоставуваше двете 5-годишни близначки.

Тој бара максимална казна за педофилот кој блудничел врз двете близачиња. Ристовски истакна дека ваквите строги казнувања треба да бидат пример за ваквите случаи.

„Ние ќе продолжиме да продуцираме нови решенија кои на овие бесчувствителни монструми ќе им покажат дека државата сериозно ќе се бори против педофилијата и оти максималните казни ќе се бараат секогаш кога се злоупотребени деца, особено на вака мала возраст", изјави министерот Ристовски.

Според актуелните закони, максималната затворска казна за вакво дело е 15 години.